|
Verschrikkelijk veule, ik bin hier geboor’n
veur drei’n zestig jaor terögge an de
Verlengde-Middenraai waor nou de Fam. Jager
woont.
Toen ik zestien jaor was mus mien Va en Moe
zo nûdig naor Nieuweroord toe in woon an de
Noorderweg, dat vun’t ik toen
verschrikkelijk!
Ik kreeg of had net verkering mit Annie en
reed toen op mien brommertie, ik had toen
eerst een Sparta en een jaor later een
Batavus wat op en neer, laoter toen ik
achtiene was mit de auto (Volkswagen kever).
Ik eb gelökkig maor vief jaor an de
Noorderweg ewoond en was weer bliede dat ik
weer terögge naor Nei-Baolinge kun. Annie
is ok geboor’n in Nei-Baolinge, waor nou de
bugalow’s staot, an de Meeuwenweg, daor
stunt vrögger zes van die kleine huusie’s.
Wij ebt eerst een half jaor bij mien
schoonvolk innewoon’t in de kievitstraote,
de reden was dat de huus’n an de Robertusweg
nog niet klaor waar’n.
Wij bint nou al weer bijna ienveertig jaor
etrouwd waorvan zestien jaor an de
Robertusweg en de rest van de tied an de
Voornweg.
Wij ebt saom iene dochter (Audrey) die ok al
weer vieftien jaor in Canada woont en
etrouwd is mit Eduard Speelman en saam’n ok
twei kiender ebt (Chantal en Roy).
Gelökkig gaore wij elk jaor mit ons beide de
grote plasse aover en ieder jaor koom’t de
kiender naor Nei-baoling toe, dan is et
groot feest.
Ik eb wel iens, dat ik deur ons mooie
dorpie fietse en ik zie bij de schoele de
Opa’s en de Oma’s die de kleinkiender naor
de schoele breng’t, of as ze mut oppas’n en
wij dan weer mut wachten as ze bij ons koomt
of wij daor weer nao toegaot.
Maar er is in de drei’n zestig jaar min de
vief jaar, dat ik in Nei-Baoling wone, heel
veule veraanderd.
In twei duuzen’t dartiene bestiet
Plaatselijk-Belang “De Veuruutgang” honderd
jaor!
As ik op een regenachtige dag en er stiet
niks in mien agenda, dan lees ik de notulen
nog wel iens deur v.a. neegtien honder’d
dartiene toen Plaotselijk-Belang is
opericht en die dan ook van “Draagt
Elkanders Lasten” (DEL) die is opgericht in
neeg’n tien honderd dartig.
Dan eb ik ontzettend veule bewondering veur
die meins’n, wat die allemaole deden veur
ons prachtige dorpie. Ik ben dan ok
ontzettend trots op alle vrijwilligers, die
dat allemaole blieft veur’t zet’n ( zie
maondelijks kontakt, en de site van (Nei-Baoling)
In de verslagen/notulen die aj dan leest,
kwaam’n toen ok al vake de zelfde naam’n
naor veur’n, um de aandere naam’n niks te
kort te doen, koom ie iedere keer de name
van Meester Siebering (roepnaam Johannes)
teeg’n, wat die man ef betieken’t veur
Nei-baoling is fantastisch, nogmaols de
aandere meins’n niks ten naodele.
Kiek maor iens naor et rieke verenigingsleem
dat wij nou nog ebt. Echt Nei-Baoling is een
kampioen onder de dorpen wat betreft de
initiatieven/activiteiten/ programma’s op et
gebied van verbetering’n en van de
leefumstandigheden van ons dorp.
Deur veule saomwarking met de
vrijwilligers/ verenigingen en clubs komp er
veule tot staan’d. Als ik terögge kieke wat
er in de öfgelop’n paor jaor an
activiteiten/ programma’s is bereikt, dan
is dat indrukwek’nd. Deur mit z’n allen an
dit dorp te wark’n, zie je ok dat de
bewoners zich nog meer positief gaot
gedraag’n. En dat zorgt er ok veur dat de
jeugd zich hoe langer en meer giet inzetten
veur et dorp. Dat mark ie an alle kaant’n.
Et is daorum ok van groot belang dat wij
allemaole bereid bint um goed naor de jeugd
te luuster’n en dat wij (en dat is jeugd en
older’n saom) veule tot staand kun’t breng’n.
Dus de spreuk van meester Siebering “Doe
niets gescheiden wat samen kan” kom ie bijna
nog dagelijks teeg’n.
En as mij wordt evraogd wat is oen mooiste
dag in Nei-Baoling.
Dat ik naor vief jaor weer terögge gung naor
Nei-Baoling, dat ik etrouwd was mit Annie en
dat onze dochter (Audrey) geboor’n is en
natuurlijk de kleinkiender.
En wat is oen mooiste herinnering as mij
daor naor evraogd zul worde’n, dan zulk
zeg’n verschrikkelijk veule.
Maor as ik dan toch iene mus neu’m alhoewel
dat verrekte moeilijk is, dan is dat de dag,
dat ik Koninklijk bin onderscheid’n op 29
april 2010 in het gemeentehuus te Beilen op
veurdracht van diverse dorpsgenoot’n/
vereningen enz, Namens de Koningin werd ik
deur burgemeester Jan Broertjes toe
espreuk’n met o.a. de tekst:
HARE MAJESTEIT DE KONINGING
Grootmeester van de orde van Oranje Nassau
HEEFT BIJ HAAR BESLUIT VAN
17 maart 2010 Albert Wielink
Geboren te Westerbork, 27 juni 1948
Benoemd tot Ridder in de Orde van
Oranje-Nassau
Daor bin ik trots op, maor ik wul er direct
bij zeg’n dat mien vrouwe Annie eigelijk
disse onderscheiding ok verdient ef.
Zij ef er altied veur ezorgd dat ik al dat
vrijwilligers wark en zitting ebbende in
diverse bestuur’n van vereniging’n en
organisatie’s, kon doen!
En vergeet al die vrijwilligers niet uut ons
mooie dorpie, an al die meins’s ek toen ok
de onderscheiding an op edraag’n. Ik bin
nog jong en ik zet mij saom’n mit aander’n
in, um van Nei-Baoling een prachtige en
gezellige en veilige leefgemeenschap te
maok’n.
Een dorp waor onze jeugd zich kan vestigen
en de oudere jeugd, waor ik ok al zo
sachie’s an bij heure, zich thuus mug’t
veul’n, hun hele leem’n laan’k.
Albert Wielink
|
